[1399] เอโกติ กมฺมปจฺจโยฯ ทฺเวกาลิโกติ อตีตปจฺจุปฺปนฺนกาลวเสน ทฺวีสุ กาเลสุ นิยุตฺโตฯ ทสฺสิโตติ ภควตา เทสิโตฯ

อิติ อภิธมฺมาวตารฏีกาย

ปจฺจยนิทฺเทสวณฺณนา นิฏฺฐิตาฯ

จตุวีสติโม ปริจฺเฉโทฯ

นิคมนกถาวณฺณนา

[1401] สุมติมติวิจารโพธโนติ สุมตีนํ สุนฺทรปญฺญานํ กวีนํ มติยา วิจารสฺส โพธโนฯ วิมติวิโมหวินาสโนติ วิมตีนํ พาลานํ วิโมหสฺส วินาสโนฯ กุมติมติมหาตโมนาโสติ กุมตีนํ พาลานํ มหาตมสนฺนิภาย มติยา นาสโกฯ ปฏุมติภาสกโรติ ปฏูนํ ปณฺฑิตานํ ติกฺขปญฺญาย โอภาสกโรฯ

[1402] สุมตินามโก ภิกฺขุ อสมานโต อสทิสาย ปูชาย มม อายาจิโต ยโต ยสฺมา การณา, ตโต ตสฺมา การณา อยํ อภิธมฺมาวตาโรฯ ปทาโต ปทาติ โกฏฺฐาสโต โกฏฺฐาสโตฯ หิตวิภาวนา ภาวนาติ หิตปฺปกาสนาย ภาวนาย มยา รจิโตฯ อถ วา อหํ สุมตินา ภิกฺขุนา อสมานโต มานโต อายาจิโต ยโต ยสฺมา, ตโต ตสฺมาฯ

[1405] ติวิธา พฺยปฺปถานญฺหิ คติโยติ พฺยปฺปถานํ วจนานํ อตฺถคนฺถยุตฺติวเสน ติวิธา คติโยฯ

[1406] นิกายนฺตรลทฺธีหีติ อญฺญสฺมิํ นิกาเย ลทฺธีหิฯ วาจนามคฺคนิสฺสิโตติ วจนปฺปพนฺธนิสฺสิโตฯ

[1410] อสํกิณฺณกุลากุเลติ อสมฺมิสฺสกุเลหิ อากิณฺเณฯ สุปสนฺนสิโตทเกติ มธุรสีโตทเกฯ

[1411] สงฺกเฏติ สมฺพาเธฯ

[1412] เกลาสสิขราการปาสาทปฏิมณฺฑิเตติ รชตปพฺพตมตฺถกนิเภหิ ปาสาเทหิ อลงฺกเตฯ

[1413] วิวิธาการจารุปาการโคปุเรติ วิวิธสณฺฐานมนุญฺญปาการทฺวารโกฏฺฐเกฯ

[1414] สลฺเลขาติ สลฺเลขวุตฺติฯ สาขลฺเยติ สขิลภาเวฯ สตาติ สติสมฺปนฺเนนฯ

[1415] วสฺสวลาหกา เทวาติ วสฺสวลาหกภูตา เทวา อมราฯ

นิคมนกถาวณฺณนา นิฏฺฐิตาฯ

อภิธมฺมาวตารปุราณฏีกา นิฏฺฐิตาฯ

ฯ นโม ตสฺส ภควโต อรหโต สมฺมาสมฺพุทฺธสฺสฯ

อภิธมฺมาวตาร-อภินวฏีกา

(ปฐโม ภาโค)